వినాయక చవితి వేడుకల్లో పాల్గొని ప్రత్యేక పూజ చేసిన ఎమ్మెల్యే

కోట్ల బజార్ లక్ష్మీ నాని సమ్మర్ స్పెషల్ వారి ఆధ్వర్యంలో నిర్వహిస్తున్న 17వ వార్షికోత్సవ వినాయక చవితి ఉత్సవాల్లో చీరాల శాసనసభ్యులు మద్దులూరి మాలకొండయ్య పాల్గొని ప్రత్యేక పూజలు నిర్వహించారు. ఈ సందర్భంగా వినాయక పందిరిలో ప్రతిష్ఠించిన వినాయక స్వామి ప్రతిమను ఎమ్మెల్యే మాలకొండయ్య దర్శించుకుని ప్రత్యేక ప్రార్థనలు చేశారు. అనంతరం భక్తులకు నిర్వహించిన సమారాధన కార్యక్రమంలో ఎమ్మెల్యే మాలకొండయ్య పాల్గొన్నారు. ఉత్సవ నిర్వాహకులు గజవల్లి శ్రీనివాసరావు ఎమ్మెల్యే మాలకొండయ్యను ఘనంగా సత్కరించారు.

ఈ సందర్భంగా ఎమ్మెల్యే మాలకొండయ్య మాట్లాడుతూ హిందువులకు అత్యంత పవిత్రమైన పండుగల్లో వినాయక చవితి ఒకటని అన్నారు. విఘ్నాలను తొలగించే విఘ్నేశ్వరుడిని భక్తిశ్రద్ధలతో ప్రార్థిస్తే ఆయన కటాక్షంతో ప్రజల సమస్యలు తొలగి, కుటుంబాల్లో సుఖశాంతులు నెలకొంటాయని పేర్కొన్నారు. ప్రతి ఒక్కరూ భక్తిభావంతో పండుగను జరుపుకోవాలని ఆకాంక్షించారు. వినాయక చవితి ఉత్సవాల్లో భాగంగా నిర్వహించిన పూజా కార్యక్రమానికి భక్తులు పెద్ద సంఖ్యలో హాజరై స్వామివారిని దర్శించుకున్నారు. ఈ కార్యక్రమంలో స్థానిక నాయకులు, ఉత్సవ నిర్వాహకులు, భక్తులు పెద్ద ఎత్తున పాల్గొన్నారు.