భరతఖండంబు చక్కని పాడియావు.. అంటూ తన కలంతో జాతీయ చైతన్యాన్ని రగిలించిన మహాకవి, ప్రముఖ రచయిత, నాటకకర్త, పాత్రికేయుడు, సంఘ సంస్కరణవాది, విద్యావేత్త చిలకమర్తి లక్ష్మీనరసింహం పంతులు గారి జయంతి సందర్భంగా ఘనంగా నివాళులర్పించారు.
తెలుగు సాహిత్యానికి విశిష్ట సేవలందించిన చిలకమర్తి లక్ష్మీనరసింహం గారు తన రచనల ద్వారా సమాజంలోని మూఢనమ్మకాలు, సామాజిక రుగ్మతలపై ప్రజల్లో చైతన్యం కలిగించారు.
స్వాతంత్య్రోద్యమ కాలంలో తన సాహిత్యాన్ని జాతీయ భావాలకు వేదికగా మలిచి, ప్రజల్లో దేశభక్తి, స్వాతంత్య్ర కాంక్షను పెంపొందించేందుకు కృషి చేశారు.
కవి, నాటకకర్తగా ఆయన అందించిన రచనలు తెలుగు సాహిత్య చరిత్రలో ప్రత్యేక స్థానం సంపాదించుకున్నాయి. ముఖ్యంగా గయోపాఖ్యానం, గణపతి వంటి రచనలు ఆయన సాహితీ ప్రతిభకు నిదర్శనంగా నిలిచాయి.
తన జీవితంలో ఎదురైన కష్టాలను అధిగమిస్తూ సాహిత్య, సామాజిక రంగాల్లో చెరగని ముద్ర వేసిన మహనీయుడు చిలకమర్తి లక్ష్మీనరసింహం. తెలుగు భాష, సాహిత్యం, సమాజం, జాతీయ చైతన్యానికి ఆయన చేసిన సేవలు చిరస్మరణీయం.
ఆ మహనీయుని జయంతి సందర్భంగా ఆయనకు హృదయపూర్వక నివాళులర్పించి, ఆయన ఆశయాలను స్ఫూర్తిగా తీసుకుని సమాజ ప్రగతికి ప్రతి ఒక్కరూ కృషి చేయాలని ఆకాంక్షిద్దాం.
