రక్షణ రంగ సాంకేతిక పరిజ్ఞాన సంస్థ టోన్బో ఇమేజింగ్ ఇండియా షేర్లు స్టాక్ మార్కెట్లలో భారీ ప్రీమియంతో లిస్ట్ అయ్యాయి. బీఎస్ఈ, ఎన్ఎస్ఈల్లో ఈ కంపెనీ షేర్లు సుమారు 66 శాతం ప్రీమియంతో ట్రేడింగ్ ప్రారంభించి, పెట్టుబడిదారుల్లో ఆసక్తిని రేకెత్తించాయి. ఐపీఓకు వచ్చిన భారీ స్పందనకు అనుగుణంగా షేర్లు బలమైన ఆరంభాన్ని నమోదు చేశాయి.
టోన్బో ఇమేజింగ్ ఇండియా ఐపీఓలో ఒక్కో షేరు ధరను రూ.665 నుంచి రూ.700 మధ్య నిర్ణయించారు. గరిష్ఠ ఇష్యూ ధర రూ.700తో పోలిస్తే, ఎన్ఎస్ఈలో షేరు రూ.1,160 వద్ద లిస్ట్ అయింది. అంటే ఒక్కో షేరుపై రూ.460 పెరుగుదలతో సుమారు 65.71 శాతం ప్రీమియం నమోదైంది. బీఎస్ఈలో ఈ షేరు రూ.1,162 వద్ద ట్రేడింగ్ ప్రారంభించింది, ఇది ఇష్యూ ధరతో పోలిస్తే సుమారు 66 శాతం అధికం.
