ప్రపంచంలోని అభివృద్ధి చెందుతున్న దేశాలు ఎదుర్కొంటున్న సవాళ్లపై ఐక్యరాజ్యసమితి సర్వసభ్య సమావేశం సందర్భంగా విదేశాంగ మంత్రి ఎస్. జైశంకర్ కీలక వ్యాఖ్యలు చేశారు. ప్రపంచ సంక్షోభాల్లో గ్లోబల్ సౌత్ దేశాలు ముందువరుసలో ఉన్నప్పటికీ, నిర్ణయాలు తీసుకునే ప్రక్రియలో మాత్రం వెనుక వరుసలో ఉన్నాయని ఆయన పేర్కొన్నారు.
గ్లోబల్ సౌత్ దేశాలు మరింత ఐక్యంగా పనిచేయాల్సిన అవసరం ఉందని జైశంకర్ అన్నారు. సరఫరా వ్యవస్థలు, ఆర్థిక వ్యవస్థలు, అనుసంధాన మార్గాల్లో అడ్డంకులు ఏర్పడకుండా చూడాలని ఆయన సూచించారు. అభివృద్ధి చెందుతున్న దేశాల పారిశ్రామికీకరణ హక్కును నిరాకరించకూడదని ఆయన స్పష్టం చేశారు.
సరఫరా వ్యవస్థల్లో కీలక అడ్డంకులను తొలగించడం, ఇంధన భద్రతను బలోపేతం చేయడం, ఆహార భద్రతకు ప్రాధాన్యం ఇవ్వడం, న్యాయమైన ఆర్థిక, వాణిజ్య విధానాలను ప్రోత్సహించడం, సముద్ర మార్గాల భద్రతను కాపాడటం, కృత్రిమ మేధస్సు వల్ల కొత్త అంతరాలు ఏర్పడకుండా చూడటం, అంతర్జాతీయ నిర్ణయాలు తీసుకునే వ్యవస్థల్లో గ్లోబల్ సౌత్కు మరింత ప్రాతినిధ్యం కల్పించడం వంటి అంశాలను ఆయన ప్రస్తావించారు.
ఇంధన లభ్యత, ధరలను రాజకీయ ప్రయోజనాల కోసం ప్రభావితం చేయకూడదని జైశంకర్ అన్నారు. అలాగే ధాన్యాలు, ఎరువుల సరఫరాలో స్థిరత్వం కోసం దేశాల మధ్య సహకారం అవసరమని ఆయన పేర్కొన్నారు.
కృత్రిమ మేధస్సు వేగంగా అభివృద్ధి చెందుతున్న నేపథ్యంలో అది దేశాల మధ్య కొత్త విభజనలకు కారణం కాకుండా చూడాలని ఆయన సూచించారు. అభివృద్ధి చెందుతున్న దేశాలు సాంకేతిక పరిజ్ఞానం, వాణిజ్యం, పర్యావరణం తదితర రంగాల్లో పరస్పర సహకారాన్ని పెంచుకోవాలని పిలుపునిచ్చారు.
ప్రపంచ వ్యవస్థలో గ్లోబల్ సౌత్ దేశాలకు మరింత సముచిత ప్రాతినిధ్యం కల్పించాల్సిన అవసరాన్ని కూడా జైశంకర్ ప్రస్తావించారు. ఈ నేపథ్యంలో అంతర్జాతీయ సంస్థల్లో సంస్కరణలు, పారదర్శక నిర్ణయ ప్రక్రియ, మరింత విస్తృత భాగస్వామ్యం అవసరమని ఆయన పేర్కొన్నారు.
