హైటెన్షన్ విద్యుత్ స్తంభానికి ఉరేసుకున్న వ్యక్తి: కుటుంబ కలహాలు, అనారోగ్యమే కారణమా

గొట్టిపాడు గ్రామానికి చెందిన గుంటుపల్లి శ్రీనివాసరావు, ఉన్నవ గ్రామానికి చెందిన ధనలక్ష్మిని వివాహం చేసుకున్నారు. అయితే, గత 12 ఏళ్లుగా భార్యాభర్తల మధ్య మనస్పర్థలు కొనసాగుతుండటంతో ఇద్దరూ వేర్వేరుగా ఉంటున్నట్లు సమాచారం. వీరికి సంతానం కూడా ఉంది, వారిలో ఒకరికి ఇప్పటికే వివాహం జరిగినట్లు తెలిసింది. ఇటీవలి కాలంలో భార్యాభర్తల మధ్య విభేదాలు తీవ్రమవ్వడంతో పాటు, శ్రీనివాసరావు ఆరోగ్య పరిస్థితి కూడా క్షీణించిందని తెలుస్తోంది. ఈ పరిణామాలతో మనస్తాపానికి గురైన శ్రీనివాసరావు, హైటెన్షన్ విద్యుత్ స్తంభానికి ఉరేసుకుని బలవన్మరణానికి పాల్పడి ఉండవచ్చని స్థానికులు అనుమానిస్తున్నారు. శుక్రవారం ఉదయం పొలాల పనులకు వెళ్లిన రైతులు శ్రీనివాసరావు మృతదేహాన్ని విద్యుత్ స్తంభానికి వేలాడుతూ గమనించారు. వెంటనే వారు పోలీసులకు సమాచారం అందించారు. సంఘటనా స్థలానికి చేరుకున్న పోలీసులు, మృతదేహాన్ని పరిశీలించి, కేసు నమోదు చేసుకుని దర్యాప్తు ప్రారంభించారు. ఈ ఘటనపై మరింత సమాచారం సేకరించేందుకు పోలీసులు ప్రయత్నిస్తున్నారు. మృతుడి కుటుంబ సభ్యుల నుండి వివరాలు తెలుసుకునే పనిలో ఉన్నారు. పోస్టుమార్టం నివేదిక వచ్చిన తర్వాత మరణానికి గల కారణాలపై స్పష్టత వచ్చే అవకాశం ఉంది.