ఆంధ్రప్రదేశ్ ఇంటర్మీడియట్ పబ్లిక్ పరీక్షలకు హాజరయ్యే విద్యార్థులు పరీక్ష ఫీజు చెల్లించేందుకు ఇంటర్మీడియట్ విద్యామండలి అవకాశం కల్పించింది. గురువారం నుంచి అక్టోబరు 29వ తేదీ వరకు ఎలాంటి అపరాధ రుసుము లేకుండా పరీక్ష ఫీజు చెల్లించవచ్చని బోర్డు తెలిపింది.
నిర్ణీత గడువులో ఫీజు చెల్లించలేని విద్యార్థులు రూ.1,000 అపరాధ రుసుముతో అక్టోబరు 30 నుంచి నవంబరు 10వ తేదీ వరకు ఫీజు చెల్లించే అవకాశం ఉంటుందని ఇంటర్మీడియట్ విద్యామండలి పేర్కొంది.
ఫీజు వివరాలు
థియరీ పేపర్లకు రూ.600, ప్రాక్టికల్ పరీక్షలకు రూ.275, బ్రిడ్జ్ కోర్సు సబ్జెక్టులకు రూ.165 ఫీజుగా ఇంటర్మీడియట్ విద్యామండలి నిర్ణయించింది. రెండో సంవత్సరం వృత్తివిద్య బ్రిడ్జ్ కోర్సు ప్రాక్టికల్స్కు రూ.275 చెల్లించాల్సి ఉంటుంది.
మొదటి, రెండో సంవత్సరాలకు కలిపి పరీక్ష ఫీజు చెల్లించే విద్యార్థులు మొత్తం రూ.1,200 చెల్లించాలని ఇంటర్మీడియట్ విద్యామండలి సూచించింది. విద్యార్థులు నిర్ణీత గడువులో పరీక్ష ఫీజు చెల్లించి, పరీక్షలకు సన్నద్ధం కావాలని ఇంటర్మీడియట్ విద్యామండలి అధికారులు సూచించారు.
