బాపట్ల, 15 November
బాపట్ల రాజకీయాల్లో కీలక పరిణామం చోటుచేసుకుంది. మాజీ ఎమ్మెల్సీ అన్నం సతీష్ ప్రభాకర్ భారతీయ జనతా పార్టీ (బీజేపీ) ప్రాథమిక సభ్యత్వానికి ఆదివారం రాజీనామా చేశారు. బాపట్ల మున్సిపల్ చైర్మన్ అభ్యర్థి ఎంపిక విషయంలో స్థానిక నాయకత్వానికి ప్రాధాన్యత ఇవ్వకపోవడంపై తీవ్ర అసంతృప్తి వ్యక్తం చేస్తూ ఈ నిర్ణయం తీసుకున్నారు.
బాపట్ల రాజకీయాల్లో కీలక పరిణామం చోటుచేసుకుంది. మాజీ ఎమ్మెల్సీ అన్నం సతీష్ ప్రభాకర్ భారతీయ జనతా పార్టీ (బీజేపీ) ప్రాథమిక సభ్యత్వానికి ఆదివారం రాజీనామా చేశారు. బాపట్ల మున్సిపల్ చైర్మన్ అభ్యర్థి ఎంపిక వ్యవహారంలో స్థానిక నాయకత్వానికి ప్రాధాన్యత ఇవ్వకపోవడంపై తీవ్ర అసంతృప్తి వ్యక్తం చేస్తూ ఈ నిర్ణయం తీసుకున్నారు. ఈ మేరకు ఆదివారం బీజేపీ రాష్ట్ర అధ్యక్షుడికి లిఖితపూర్వకంగా రాజీనామా లేఖను పంపించారు. తన రాజీనామా లేఖలో సతీష్ ప్రభాకర్ పలు కీలక అంశాలను ప్రస్తావించారు. 2019లో శాసనమండలి సభ్యత్వ పదవీకాలం మరో రెండేళ్లు మిగిలి ఉండగానే రాజకీయంగా కీలక నిర్ణయం తీసుకుని, ప్రధాని నరేంద్ర మోదీ నాయకత్వానికి ఆకర్షితులై బీజేపీలో చేరినట్లు పేర్కొన్నారు. గత ఏడేళ్లుగా పార్టీ అభివృద్ధికి కృషి చేస్తున్నానని, ఎలాంటి పదవులు ఆశించకుండా పార్టీ పట్ల నిబద్ధతతో పనిచేస్తున్నానని వివరించారు.
ప్రస్తుతం రాష్ట్రంలో జరుగుతున్న స్థానిక సంస్థల ఎన్నికల్లో భాగంగా బాపట్ల మున్సిపల్ చైర్మన్ అభ్యర్థి ఎంపిక విషయంలో స్థానిక నాయకులు, కార్యకర్తల అభిప్రాయాలను పరిగణనలోకి తీసుకోకుండా నిర్ణయం తీసుకోవడం పట్ల ఆయన అభ్యంతరం వ్యక్తం చేశారు. స్థానిక ప్రజల ఆత్మగౌరవాన్ని కాపాడాల్సిన బాధ్యతను గుర్తుచేస్తూ, బాపట్ల మున్సిపల్ చైర్మన్ అభ్యర్థిగా స్థానిక వ్యక్తికి అవకాశం కల్పించకుండా తీసుకున్న నిర్ణయం తనను తీవ్రంగా బాధించిందని లేఖలో పేర్కొన్నారు. స్థానిక నాయకుల అభిప్రాయాలకు విలువ ఇవ్వకుండా, స్థానిక ప్రజల ఆకాంక్షలను పరిగణనలోకి తీసుకోకుండా పార్టీ నిర్ణయాలు తీసుకోవడం సరైన విధానం కాదని ఆయన అభిప్రాయాన్ని వెల్లడించారు. ఈ నేపథ్యంలో బీజేపీ ప్రాథమిక సభ్యత్వానికి రాజీనామా చేస్తున్నట్లు ప్రకటించి, తన రాజీనామాను ఆమోదించాలని రాష్ట్ర అధ్యక్షుడిని కోరారు. అన్నం సతీష్ ప్రభాకర్ రాజీనామాతో బాపట్ల రాజకీయాల్లో కొత్త చర్చ మొదలైంది. నియోజకవర్గంలో తనకంటూ ప్రత్యేక అభిమానగణం, అనుచరవర్గం కలిగిన నాయకుడిగా గుర్తింపు ఉన్న ఆయన నిర్ణయం కూటమి రాజకీయాలపై ఎలాంటి ప్రభావం చూపుతుందన్నది ఆసక్తికరంగా మారింది. మున్సిపల్ చైర్మన్ అభ్యర్థి ఎంపికతో ప్రారంభమైన అసంతృప్తి ఇప్పుడు బీజేపీకి రాజీనామా వరకు వెళ్లడం బాపట్ల రాజకీయాల్లో చర్చనీయాంశంగా మారింది. రాజీనామా అనంతరం అన్నం సతీష్ ప్రభాకర్ తదుపరి రాజకీయ కార్యాచరణ ఎలా ఉండబోతోంది ఆయన అనుచరుల నిర్ణయం ఏమిటి బాపట్ల మున్సిపల్ ఎన్నికలపై ఈ పరిణామం ఎలాంటి ప్రభావం చూపనుంది అన్న అంశాలపై రాజకీయ వర్గాల్లో ఆసక్తి నెలకొంది.
