భారతీయ సనాతన ధర్మ పరిరక్షణ, హిందూ సంస్కృతీ సంప్రదాయాల పరివ్యాప్తి, సమాజ హితమే ప్రధాన ధ్యేయాలుగా దేశవ్యాప్తంగా నూతన అధ్యాయానికి శ్రీకారం చుడుతూ రాష్ట్రీయ హిందూ రక్షక్ సంఘ్ () జాతీయ స్థాయిలో ప్రారంభం కాబోతోంది. ఈ ప్రతిష్టాత్మక సంస్థ వ్యవస్థాపకులు, కాబోయే జాతీయ అధ్యక్షులు డా. శ్రీకాంత్ చెన్నుపాటి, ప్రముఖ హిందూ ధార్మిక నేత సిద్ధేష్ గౌడ్ పరస్పరం భేటీ అయి సనాతన ధర్మ వ్యాప్తి, సంస్థ బలోపేతంపై సుదీర్ఘంగా చర్చించారు.
ఈ సందర్భంగా డా. శ్రీకాంత్ చెన్నుపాటి మాట్లాడుతూ, దేశవ్యాప్తంగా హిందూ ధర్మ ఔన్నత్యాన్ని చాటడానికి, యువతలో సంస్కృతీ సంప్రదాయాల పట్ల స్పృహను పెంపొందించడానికి కార్యాచరణను రూపొందిస్తున్నట్లు తెలిపారు. ముఖ్యంగా దక్షిణ భారతదేశంలో సంస్థను క్షేత్రస్థాయికి తీసుకెళ్లడంలో సిద్ధేష్ గౌడ్ తమ వంతు సహకారాన్ని అందించి, ముందుండి నడిపించాలని కోరారు.
సిద్ధేష్ గౌడ్ మద్దతు
ఈ ఆహ్వానంపై సిద్ధేష్ గౌడ్ ఎంతో సానుకూలంగా స్పందిస్తూ, డా. శ్రీకాంత్ చెన్నుపాటి చేపట్టిన ఈ ధార్మిక సంకల్పానికి తన పూర్తి మద్దతు ఉంటుందని స్పష్టం చేశారు. కర్ణాటక రాష్ట్రవ్యాప్తంగా ప్రతి గ్రామం, పట్టణంలో పర్యటించి సిద్ధాంతాలను ప్రజల్లోకి తీసుకెళ్తానని, సంస్థ బలోపేతానికి నిరంతరం కృషి చేస్తానని హామీ ఇచ్చారు.
అనంతరం సిద్ధేష్ గౌడ్ మాట్లాడుతూ, సనాతన ధర్మం కేవలం ఒక ఆచారం మాత్రమే కాదు, అది విశ్వమానవ కళ్యాణాన్ని కాంక్షించే జీవన విధానం. నేటి ఆధునిక కాలంలో మన ప్రాచీన సంస్కృతి, హిందూ జీవన విలువల పరిరక్షణ అత్యంత ఆవశ్యకం అని అన్నారు. రాష్ట్రీయ హిందూ రక్షక్ సంఘ్ జాతీయ అధ్యక్షుడిగా డా. శ్రీకాంత్ చెన్నుపాటి బాధ్యతలు స్వీకరించడం సంతోషకరం. వారి సమర్థవంతమైన నాయకత్వంలో ఈ సంస్థ దేశవ్యాప్తంగా ధర్మ రక్షణ కవచంగా మారుతుందని ధీమా వ్యక్తం చేశారు.
త్వరలో జరగనున్న జాతీయ అధ్యక్షుల ప్రమాణ స్వీకార మహోత్సవం అత్యంత ఘనంగా, చారిత్రాత్మకంగా జరగాలని ఆయన అన్నారు. ఈ శుభకార్యానికి తాను స్వయంగా హాజరవుతానని తెలిపారు. ఈ భేటీలో ఇరువురు నేతలు హిందూ సంప్రదాయాల ప్రాముఖ్యత, రాబోయే రోజుల్లో చేపట్టాల్సిన సేవా, ధార్మిక కార్యక్రమాలపై లోతైన కసరత్తు జరిపారు. త్వరలోనే ఢిల్లీ వేదికగా జరగనున్న జాతీయ కార్యవర్గ ప్రమాణ స్వీకారోత్సవ తేదీ, వేదిక వివరాలను అధికారికంగా వెల్లడించనున్నట్లు సంస్థ ప్రతినిధులు తెలిపారు.
