బాపట్ల, 10 September
మార్టూరులోని విలేజ్ హెల్త్ క్లినిక్లో వీధి కుక్కల బెడద స్థానికులను తీవ్ర ఆందోళనకు గురిచేస్తోంది. వైద్యం కోసం వచ్చే రోగుల మధ్యనే కుక్కలు స్వేచ్ఛగా తిరుగుతుండటంతో భద్రతపై భయాందోళనలు వ్యక్తమవుతున్నాయి.
హెల్త్ క్లినిక్లోకి వీధి కుక్కలు! ప్రజలకు ప్రాథమిక వైద్య సేవలు అందించాల్సిన విలేజ్ హెల్త్ క్లినిక్ వద్ద వీధి కుక్కల బెడద ఆందోళన కలిగిస్తోంది. క్లినిక్ పరిసరాల్లో తిరుగుతున్న వీధి కుక్కలు ఏకంగా క్లినిక్ లోపలికి సైతం ప్రవేశిస్తూ యథేచ్ఛగా సంచరిస్తున్న దృశ్యాలు స్థానికులను ఆందోళనకు గురిచేస్తున్నాయి.వైద్యం కోసం వచ్చే చిన్నారులు, వృద్ధులు, మహిళలు, అనారోగ్యంతో ఉన్న రోగుల మధ్యే కుక్కలు తిరుగుతుండటంతో ఎప్పుడు ఏ ప్రమాదం జరుగుతుందోనన్న భయం నెలకొంది. ముఖ్యంగా కుక్కలు ఒక్కసారిగా దాడి చేస్తే పరిస్థితి తీవ్రంగా మారే అవకాశం ఉందని స్థానికులు ఆందోళన వ్యక్తం చేస్తున్నారు. ప్రజలకు ఆరోగ్య సేవలు అందించాల్సిన కేంద్రంలోనే ఇలాంటి పరిస్థితి నెలకొనడంపై స్థానికులు ప్రశ్నిస్తున్నారు. విలేజ్ హెల్త్ క్లినిక్లోకి వీధి కుక్కలు రాకుండా తగిన రక్షణ చర్యలు చేపట్టడంతో పాటు, వీధి కుక్కల నియంత్రణపై అధికారులు వెంటనే చర్యలు తీసుకోవాలని ప్రజలు కోరుతున్నారు.
